ELEKTR YURITMALARNING ORTIQCHA YUKLANISHI NATIJASIDA YUK KO‘TARUVCHI KONVEYER MEXANIZMLARIDA YUZAGA KELADIGAN TEXNOLOGIK BUZILISHLARNING ELEKTR ENERGIYASI SIFATIGA TA’SIRINI BAHOLASH

Ushbu maqolada elektr yuritmalarining ortiqcha yuklanish sabablari, yuzaga keladigan buzilishlarni tasniflash hamda ularning elektr energiyasi sifat ko‘rsatkichlariga — kuchlanish, chastota, fazalar simmetriyasi va quvvat koeffitsiyentiga ta’sirini aniqlash bo‘yicha keng qamrovli tahlil amalga oshiriladi. Hozirgi vaqtda yuk ko‘taruvchi mexxanizmlarning ortishi transport masofasining uzayishiga olib kelib, konveyer elektr yuritma tizimining ekspluatatsion xarajatlarini oshirmoqda. Bundan tashqari, ruda tashish uchun mo‘ljallangan elektr yuritma tizimi ko‘plab qurilmalar bilan ishlaydi va ularning parametrlarini optimallashtirish zarur. Zamonaviy konchilik korxonalarida elektr yuritma tizimlarining ishonchliligi va energiya samaradorligiga alohida e’tibor qaratiladi. Transport liniyalari uzunligining ortishi yuritma agregatlaridagi mexanik va elektr yuklamalarning oshishiga sabab bo‘lib, ularning ortiqcha yuklanish sabablarini batafsil tahlil qilishni taqozo etadi. Ortiqcha yuklanishlar yuritmalar o‘rtasida yuklamaning notekis taqsimlanishi, ta’minlovchi kuchlanishning tebranishlari, shuningdek, mexanik qismlarning yoyilishi tufayli yuzaga kelishi mumkin. Ushbu omillar elektr energiyasi sifat ko‘rsatkichlariga — kuchlanish barqarorligi, chastota, fazalar simmetriyasi va quvvat koeffitsienti — bevosita ta’sir ko‘rsatadi. Ushbu ko‘rsatkichlarning me’yorlardan chetlanishi tizimning umumiy samaradorligini pasaytiradi va ekspluatatsion xarajatlarni oshiradi. Shu bois, ko‘p yuritmaga ega konveyer tizimlari ishining o‘ziga xos xususiyatlarini hisobga olgan holda nosozliklarni diagnostika qilish va tasniflash usullarini ishlab chiqish hamda elektr yuritma parametrlarini optimallashtirish dolzarb vazifa bo‘lib, bu ularning ishonchliligini oshirish va energiya sarfini kamaytirishga imkon beradi.